DINIYAH ULA, SALAHSAWIOSNA LEMBAGA ATIKAN MUNGGARAN NGEUNAAN AGAMA

دِيْنِيَّةٌ (Diiniyyah) ditilik tina jihat basa hartosna “kaagamaan”, kawitna tina lafadz diinun (دِيْنٌ) hartosna “agama”, lajeng di-masdar-keun ku pola Masdar sina-i, mangka tina lafadz diinun janten Diiniyyatun, ma’na-na nyaeta janten “kaagamaan” tea.

Sedengkeun أُوْلَى (Ulaa) hartosna “nu awal, munggaran, ngamimitian, anu kahiji, kapungkur”. Anapon dumasar sistem Pendidikan Pesantren Persatuan Islam (PPI), Diniyah Ula nyaeta jenjang sakola agama non formal sayuswa SD atanapi MI, nyaeta 7 (tujuh) dugikeun ka 12 (dua welas) taun.

 

Murid anu diajar di Diniyah Ula disebatna santri, sakumaha murid Madrasah Ibtidaiyah, Tsanawiyah, kalih Mu’allimien. Istilah santri mangrupikeun salah sawios unsur kapasantrenan lian ti ulama, masjid, pondok atanapi asrama, jeung kajian “kitab koneng”.

Ditilik tina yuswa munggaran santri Diniyah Ula nyaeta 7 (tujuh) taun, eta perkawis luyu sareng katangtosan ti Nabi Shollallohu ‘alaihi wa sallam ngeunaan kawajiban sepuh ngatik ngadidik murangkalih perkawis shalat.

عَنْ عَبْدِ اللهِ بْنِ عَمْرٍو رَضِيَ اللهُ عَنْهُمَا قَالَ: قَالَ رَسُوْلُ اللهِ صَلَّى اللهُ عَلَيْهِ وَسَلَّمَ: "مُرُوْا أَوْلَادَكُمْ بِالصَّلَاةِ وَهُمْ أَبْنَاءُ سَبْعِ سِنِيْنَ ، وَاضْرِبُوْهُمْ عَلَيْهَا وَهُمْ أَبْنَاءُ عَشْرِ سِنِيْنَ ، وَفَرِّقُوْا بَيْنَهُمْ فِي الْمَضَاجِعِ".

Ti ‘Abdulloh ibn ‘Amr Radliyallohu ‘anhuma, anjeunna sasanggem: Rosululloh Shollallohu ‘alaihi wa sallam ngandika, “Parentahkeun ku aranjeun ka marurangkalih aranjeun pikeun ngadegkeun sholat nalika aranjeunna yuswa tujuh taun, sarta tareunggeul aranjeunna pikeun ngalaksanakeun sholat nalika yuswana sapuluh taun, oge pisah-pisahkeun antawis aranjeunna dina tempat kulemna”. (HR Abu Dawud, Ahmad, Al-Hakim) 

Hadis kasebat mangrupikeun salahsawios praktek tina ngalaksanakeun dawuhan Alloh dina QS at-Tahrim: 6.

يَا أَيُّهَا الَّذِينَ آمَنُوا قُوا أَنْفُسَكُمْ وَأَهْلِيكُمْ نَارًا وَقُودُهَا النَّاسُ وَالْحِجَارَةُ عَلَيْهَا مَلَائِكَةٌ غِلَاظٌ شِدَادٌ لَا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ

Yeuh, jalma-jalma anu ariman! Geura raksa diri maraneh jeung kulawarga naraneh tina siksaan naraka anu suluhna manusa jeung batu; nu dijaga ku malaikat nu garagah, anu henteu wangkelang ka Allah (dina hal) naon anu diparentahkeun ku Anjeunna ka maranehna, sarta ngalaksankeun saniskara anu diparentahkeun ka maranehna. (QS at-Tahrim: 6)

Ngatik ngadidik murangkalih kana sholat mangrupikeun hiji tina sapuluh dadasar Pendidikan Islam anu diuningakeun dina QS Lukman: 12-19 nalika ngebrehkeun wasiat Lukman ka murangkalihna.

 

Sapuluh dadasar Pendidikan Islam dumasar wasiat Luqman Al-Hakim anu henteu tiasa dipisah-pisah teh nyaeta: [1]Nebihkeun murangkalih tina pamusyrikan (ayat 13), [2]Nancebkeun karakter katauhidan (ayat 16), [3]Marentah murangkalih pikeun ngadegkeun sholat (ayat 17), [4]Ngabentuk murangkalih anu siap amar ma’ruf (ayat 17), [5]Ngawujudkeun murangkalih anu henteu keueung pikeun nahyi munkar (ayat 17), [6]Nekenkeun murangkalih pikeun sabar mayunan sagala pura anu tumiba ka anjeunna (ayat 17), [7]Nebihkeun murangkalih tina paripolah ngabalieurkeun beungeut ti papada manusa (ayat 18), [8]Ngaulahkeun murangkalih leumpang di bumi kalawan sombong (ayat 18), [9]Ngawujudkeun diri murangkalih anu sineger tengah dina lumampah (ayat 19), sarta [10]Marentahkeun murangkalih pikeun ngalahonkeun suanten (ayat 19).

Dawuhan Alloh Ta’ala:

وَلَقَدْ آتَيْنا لُقْمانَ الْحِكْمَةَ أَنِ اشْكُرْ لِلَّهِ وَمَنْ يَشْكُرْ فَإِنَّما يَشْكُرُ لِنَفْسِهِ وَمَنْ كَفَرَ فَإِنَّ اللَّهَ غَنِيٌّ حَمِيدٌ (12)

Satemena Kami geus maparin hikmah ka Luqman, yen geura muji sukur ka Allah, karana sing saha anu muji sukur, nya muji sukurna teh taya lian pikeun dirina, jeung sing saha anu kupur, nya satemena Allah teh Maha beunghar tur maha pinuji.

وَإِذْ قالَ لُقْمانُ لابْنِهِ وَهُوَ يَعِظُهُ يا بُنَيَّ لا تُشْرِكْ بِاللَّهِ إِنَّ الشِّرْكَ لَظُلْمٌ عَظِيمٌ (13)

(sing inget) nalika Luqman nyarita ka anakna bari nganasehatan manehna: Yeuh anaking! poma maneh ulah nyarekatkeun (naon-naon) ka Allah, karana satemena ari sirik teh mangrupakeun kadoliman anu kacida gedena. 

وَوَصَّيْنَا الْإِنْسانَ بِوالِدَيْهِ حَمَلَتْهُ أُمُّهُ وَهْناً عَلى وَهْنٍ وَفِصالُهُ فِي عامَيْنِ أَنِ اشْكُرْ لِي وَلِوالِدَيْكَ إِلَيَّ الْمَصِيرُ (14)

Kami marentah ka manusa sangkan to’at ka indung-bapana; indungna geus ngakandung manehna kalawan ripuh jeung beuki lila beuki ripuh, jeung (waktu) nyapih anakna teh dina mangsa dua taun. Prak geura muji sukur ka Kami jeung ka Indung bapa maneh; nya ka Kami maraneh baris mulang.

وَإِنْ جاهَداكَ عَلى أَنْ تُشْرِكَ بِي ما لَيْسَ لَكَ بِهِ عِلْمٌ فَلا تُطِعْهُما وَصاحِبْهُما فِي الدُّنْيا مَعْرُوفاً وَاتَّبِعْ سَبِيلَ مَنْ أَنابَ إِلَيَّ ثُمَّ إِلَيَّ مَرْجِعُكُمْ فَأُنَبِّئُكُمْ بِما كُنْتُمْ تَعْمَلُونَ (15)

Upama maranehna (indung bapak) maksa maneh supaya nyarekatkeun ka Kami naon-naon anu maneh henteu boga elmu perkara eta, nya maneh ulah pisan to’at ka maranehna, tapi kudu campurgaul jeung maranehna dina urusan dunya kalawan cara anu hade, jeung geura turut jalana jalma anu mulang ka Kami, tuluy nya ka Kami baris mulang maraneh. Tuluy kami bakal nunjukeun ka maraneh (wawales) saniskara anu geus dilampahkeun ku maraneh.

يا بُنَيَّ إِنَّها إِنْ تَكُ مِثْقالَ حَبَّةٍ مِنْ خَرْدَلٍ فَتَكُنْ فِي صَخْرَةٍ أَوْ فِي السَّماواتِ أَوْ فِي الْأَرْضِ يَأْتِ بِهَا اللَّهُ إِنَّ اللَّهَ لَطِيفٌ خَبِيرٌ (16)

(Ceuk Luqman): yeuh anaking! satemena upama aya hiji pagawean sanajan sagede siki sasawi nu ayana dina jero batu, atawa di langit, atawa di bumi oge, tanwande Allah bakal nembongkeunana, karana Allah teh maha latif turta maha uninga.

 

يا بُنَيَّ أَقِمِ الصَّلاةَ وَأْمُرْ بِالْمَعْرُوفِ وَانْهَ عَنِ الْمُنْكَرِ وَاصْبِرْ عَلى ما أَصابَكَ إِنَّ ذلِكَ مِنْ عَزْمِ الْأُمُورِ (17)

Yeuh anaking! prak adeugkeun solat, geura amar ma’ruf nahi munkar, jeung masing sabar kana saniskara anu tumiba ka maneh, satemena eta teh mangrupakeun perkara-perkara anu penting.

وَلا تُصَعِّرْ خَدَّكَ لِلنَّاسِ وَلا تَمْشِ فِي الْأَرْضِ مَرَحاً إِنَّ اللَّهَ لا يُحِبُّ كُلَّ مُخْتالٍ فَخُورٍ (18)

Jeung poma maneh ulah ngabalieurkeun beungeut ti manusa sarta ulah leumpang di bumi kalawan sombong, karana satemena Allah henteu micinta sakur jalma anu sombong tur adigung.

وَاقْصِدْ فِي مَشْيِكَ وَاغْضُضْ مِنْ صَوْتِكَ إِنَّ أَنْكَرَ الْأَصْواتِ لَصَوْتُ الْحَمِيرِ (19)

Jeung masing sineger tengah we dina lumampah teh, sarta launkeun sora maneh, karana sora nu panggorengna mah nya sora himar”. (QS Luqman: 12-19)

 

Mangrupi-rupi mata pelajaran di Diniyah Ula upanten dilaksanakeun kalawan saenya-enyana, Insya Alloh baris ngalaksanakeun sapuluh dadasar Pendidikan Islam anu diuningakeun dina QS Lukman: 12-19 kasebat. Kayaning mata pelajaran Al-Quran (Tilawah, Tahsin, Tarjamah, Tafsir Ringkes, kalih Tahfidz), Al-Hadits, Tauhid, Asy-Syari’ah (Fiqih kalih Ushul Fiqih), Mahfudzah Akhlaq kalih Adabiyyah. Malihan, pikeun mahamkeun murangkalih kana mangrupi-rupi mata pelajaran kasebat teh dirojong ku mata pelajaran – mata pelajaran anu lianna sapertos Bahasa Arab I (Nahwu, Shorof, I’rob), Bahasa Arab II (Lughoh, Qiro’ah, Kitabah, Imla, Insya, kalih Hiwar), kalih Tarikh Nabi Muhammad Shollallohu ‘alaihi wa sallam.

 

Tinangtos dina ngawujudkeun Diniyah Ula, Salaku Atikan Munggaran Ngeunaan Agama meryogikeun lengkah-lengkah gawe bareng tur silih rojong antawis: [1]Bidgar Pendidikan PERSIS sadaya level salaku anu ngokolakeunana, [2]Pimpinan Jam’iyyah PERSIS sadaya level anu kagungan kalih nangtayunganana, langkung utami PJ (Pimpinan Jama’ah). [3]Mudir kalih Asatidzah salaku anu ngurus kalih ngatik ngadidikna, [4]Sepuh para santri salaku anu hakikat tanggung waler kana kasholehan murangkalih, oge [5]Masyarakat (anggota, simpatisan, kalih umum) oge pihak pamarentahan salaku anu baris ngaraoskeun mangfaatna.

 

Wallohu A’lam. by Bidang Pendidikan PC Pemuda Persis Pangalengan, didugikeun dina Rihlah Imtihan PPI 224 Diniyah Ula Nurul Yaqin Cipanas di Wahana Wisata Hutan Pinus Rahong – Pangalengan, 8 Juli 2019 M/ 5 Dzulqa’dah 1440 H.