ALLAH TEU TALEDOR

ALLAH TEU TALEDOR

KHUTBAH KAHIJI

إِنَّ الْحَمْدَ لِلَّهِ نَحْمَدُهُ وَنَسْتَعِينُهُ وَنَسْتَغْفِرُهُ وَنَعُوذُ بِاللَّهِ مِنْ شُرُورِ أَنْفُسِنَا وَسَيِّئَاتِ أَعْمَالِنَا مَنْ يَهْدِهِ اللَّهُ فَلَا مُضِلَّ لَهُ وَمَنْ يُضْلِلْ فَلَا هَادِيَ لَهُ وَأَشْهَدُ أَنْ لَا إِلَهَ إِلَّا اللَّهُ وَحْدَهُ لَا شَرِيكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ صَلَّى اللهُ عَلَيْهِ وَسَلَّمَ تَسْلِيْمًا كَثِيْرًا.

يٰٓاَيُّهَا الَّذِيْنَ اٰمَنُوا اتَّقُوا اللّٰهَ حَقَّ تُقٰىتِهٖ وَلَا تَمُوْتُنَّ اِلَّا وَاَنْتُمْ مُّسْلِمُوْنَ. يٰٓاَيُّهَا النَّاسُ اتَّقُوْا رَبَّكُمُ الَّذِيْ خَلَقَكُمْ مِّنْ نَّفْسٍ وَّاحِدَةٍ وَّخَلَقَ مِنْهَا زَوْجَهَا وَبَثَّ مِنْهُمَا رِجَالًا كَثِيْرًا وَّنِسَاۤءً ۚ وَاتَّقُوا اللّٰهَ الَّذِيْ تَسَاۤءَلُوْنَ بِهٖ وَالْاَرْحَامَ ۗ اِنَّ اللّٰهَ كَانَ عَلَيْكُمْ رَقِيْبًا. يٰٓاَيُّهَا الَّذِيْنَ اٰمَنُوا اتَّقُوا اللّٰهَ وَقُوْلُوْا قَوْلًا سَدِيْدًاۙ يُّصْلِحْ لَكُمْ اَعْمَالَكُمْ وَيَغْفِرْ لَكُمْ ذُنُوْبَكُمْۗ وَمَنْ يُّطِعِ اللّٰهَ وَرَسُوْلَهٗ فَقَدْ فَازَ فَوْزًا عَظِيْمًا. أَمَّا بَعْدُ.

Dina kahirupan sapopoe urang kadang ningal perkara anu papalingpang. Aya jalma anu midamel kasaean, tapis acara dohir kadunyaan matak pikawatireun. Nyakitu deui aya anu sok migawe kagorengan, tapi dina urusan dunyana teh matak resep anu nempo.

Pikeun jalma anu iman kaayaan saperti kitu teh moal lila kaalaman. Aya panempo hate anu didadasaran ku kayakinan ka Allah Subhanahu wa Ta’ala. Pituduh ti Allah SWT mangrupa Al-Qur’an, al-Sunnah oge Hidayah janten obor dina nangtoskeun bebeneran. Allah SWT ngandika:

وَلَا تَحْسَبَنَّ اللّٰهَ غَافِلًا عَمَّا يَعْمَلُ الظّٰلِمُوْنَ ەۗ اِنَّمَا يُؤَخِّرُهُمْ لِيَوْمٍ تَشْخَصُ فِيْهِ الْاَبْصَارُۙ .

Jeung poma pisan maneh (Muhammad) ulah nyangka, yen Allah taledor tina saniskara anu dilampahkeun ku jalma-jalma anu darolim. Saestuna Allah ngan maparin tempo ka maranehna nepi ka waktu molohona sakabeh mata. Qs. Ibrahim [14]: 42.

Hadirin Rahimakumullah!

Tos sababaraha sasih Malih mangtaun-taun wargi urang di Palestina dikekeyek ku Zionis. Moal Aya hiji daerah anu sakuriling bungking ditingker benteng anu luhur pisan. Beton sakira salapan meter nutup sabudeureun kota Gaza. Di satukangeunana Aya benteng deui bari dikawal ku tantara Zionis. Atuh lamun hayang ngaliwat teh kudu nembus lapisan pengamanan Zionis. Nya teu aneh upama loba barang-barang kabutuhan sapopoe urang Gaza teu tembus kahalang ku eta benteng. Teu cukup Kitu, ampir opat bulan ayeuna Zionis ngabom teu Aya eureuna ka daerah Gaza. Eta ngebom teu sirikna unggal tempat oge ampir unggal poe. Nepa ka Rumah Sakit oge tempat ngungsi wae dibom. Atuh puluhan rewu urang Gaza Palestina jadi korban.

Ningal kieu urang malah masarakat Dunya anu Aya keneh hate ngarakacak. Demo oge protes di mana-mana dilakukeun. Naha secara pribadi, lembaga, malah Nagara ngalaknat Kana talajak Zionis teh. Tapi weleh Zionis teh teu eureun. Nu Aya mah ngadon ngahajakeun. Dina mangsa kitu urang Jeung anu sejen sok aya gerentes iraha ieu beresna? Iraha Zionis sadar tina kakaliruanana? Saha anu bisa mereskeunana? Iraha Allah SWT ngalungsurkeun pitulungna? Jeung pananya-pananya sejenna.

Sidang Jum’ah Rahimakumullah!

Dina ayat di luhur kaunggel: Wa laa tahsabanna Allaah ghoofilan ‘ammaa ya’malu al-dzaalimuun, jeung poma pisan maneh (Muhammad) ulah nyangka, yen Allah taledor tina saniskara anu dilampahkeun ku jalma-jalma anu darolim. Eta ayat dina awalna memang kangge Rasulullah Shallallahu ‘alaihi wa sallam. Mung, urang salaku umatna oge kapeto ku eta ayat. Ku kituna urang ulah boga panyangka yen Allah SWT taledor tina saniskara anu dipilampah ku jalma-jalma dolim.

Dolim teh nyaeta nyokot hak ti anu ngapimilikna oge mikeunna ka anu sejenna. Kitu kasauran al-Sya’rowi. Eta nyokot hak tangtuna ku cara nu teu bener. Upama bener mah nyokot hak anu sejen teh teu jadi masalah oge moal disebut dolim.

Ma’asyiral mu’minin rahimakumullah!

Sapertos anu kauninga dolim teh seueur wujudna. Satiap hal anu teu leres atanapi teu adil bisa ragrag kana darajat dolim. Urusan sareng Allah, jalma sejen, mahluk nu lainna, malah ka diri sorangan bisa jadi aya kadoliman. Kadoliman dina urusan akidah aya anu disebut syirik. Jalma nyokot hak Allah SWT anu sakedahna diyakinkeun Kaesaanana ku masrahkeun hak eta ka mahluk-Na. ieu teh dolim. Nyakitu deui kadoliman ku nyieun mangrupa-rupa dosa ka papada jalma. Sasama muslim teu meunang ngaganggu kana harta, getih oge harga diri. Upama teu dijaga nya bakal kajadian dolim. Hal eta lumaku oge ka diri urang sorangan. Urang milampah mangpirang-pirang dosa hakekatna mah eta teh ngadolim diri urang sorangan. Dalah ngaganggu jalma oge mahluk sejenna sabenerna mah eta teh sarua jeung urang ngadolim diri urang sorangan.

بَارَكَ اللهُ لِيْ وَلَكُمْ.

KHUTBAH KADUA

اَلْحَمْدُ للهِ الَّذِيْ أَرْسَلَ رَسُوْلَهُ بِالهُدَى وَدِيْنِ الحَقِّ لِيُظْهِرَهُ عَلَى الدِّيْنِ كُلِّهِ وَكَفَى بِاللهِ شَهِيْدًا، وَأَشْهَدُ أَنْ لَا إِلهَ إِلَّا اللهُ وَأَشْهَدُ أَنَّ مُحَمَّدًا عَبْدُهُ وَرَسُوْلُهُ. وَبَعْدُ.

Nalika jalma lukamu dolim di ieu dunya nya kudu sadar ayana Allah oge aherat. Allah Nu Maha Uninga kana sagala perkara. Aherat mangrupakeun mangsa oge tempat ngajejegkeun kaadilan oge ngabales kadoliman. Wa laa tahsabanna Allaah ghoofilan ‘ammaa ya’malu al-dzaalimuun, jeung poma pisan maneh (Muhammad) ulah nyangka, yen Allah taledor tina saniskara anu dilampahkeun ku jalma-jalma anu darolim.

Nalika aya kadoliman, komo anu nataku mah, urang sok hayang nempo balesanna sacara langsung. Siga Zionis anu meupeuh urang Palestina nya urang sok hayang nempo ayeuna keneh ku Allah SWT disiksa. Tapi geuningan teu kitu.

Dina lumangsungna kadoliman bari ku Allah teu dibales nya ieu aya sababaraha kamungkinan. Naha Allah SWT talobeh ti anu lumaku dolim, lemah kangge ngabales, atanapi rido kana eta kadoliman. Tapi tilu hal eta teh teu mungkin kangge Allah. “Nalika laley, lemah oge rido kadoliman mustahil kanggo Allah nya kahalangan weh, yen Allah moal ngabales kadoliman ka jalma anu dolim,” saur al-Razi. Talobeh nyaeta taledor tina hiji perkara dilantarankeun teu sadar atawa teu merhatikeun. “Ieu mangrupakeun perkara anu moal kajantenan ka Allah Subhanahu wa Ta’ala. Mantenna teh al-Qoyyum oge teu keuna ku nundutan sareng kulem.” Jelas al-Sya’rowi.

Allah Ta’ala ngawaskeun ka satiap mahluk, kalebet ka jalma anu dolim. Allah Ta’ala ngawaskeun, ngahisab oge tulaten kalebet perkara anu alit atanapi teu pira. Sadayana aya catetanana oge bakal dibales.

Nalika Allah Ta’ala teu nyiksa anu dolim di dunya tinangtu eta teh hikmah Kapangeranan anu mangpaatna mulih kangge kamaslahatan jalma. Kitu saur al-Zuhaili dina tapsirna. “Ieu mangrupikeun sunnah Allah masihan kasempetan sababaraha waktos ka anu maksiat,” jelas al-Zuhaili. Upama eta jalma anu dolim teu babalik pikir nya kasempetan anu aya teh lain pikeun kamaslahatan. Nya anu aya mah ngadon beuki ngabahayakeun dirina. “Ieu teh lain perkara anu nuduhkeun, yen kaayaan maranehna hade. Saestuna Allah Ta’ala masihan tempo anu dolim oge nundana supaya nambah dosa,” saur al-Sa’di. Na’uudzu billaahi min dzaalik upama saperti kitu.

Jama’ah Jum’ah Rahimakumullah!

Wa laa tahsabanna Allaah ghoofilan ‘ammaa ya’malu al-dzaalimuun, jeung poma pisan maneh (Muhammad) ulah nyangka, yen Allah taledor tina saniskara anu dilampahkeun ku jalma-jalma anu darolim. “Saestuna ieu teh panglipur kangge anu didolim oge ancaman pikeun anu dolim,” jelas Sufyan bin ‘Uyainah. “Ieu teh ancaman pikeun anu dolim oge hiburan kangge anu didolim,” saur Maimun bin Mihran. Ku kituna teu kedah naroskeun Tindakan Allah perkawis kadoliman. Nu sakedahna mah nya urang teu dolim oge ihtiar ngeureunkeun kadoliman. Allah mah teu taledor.

اللَّهُمَّ أَعِنِّي عَلَى ذِكْرِكَ وَشُكْرِكَ وَحُسْنِ عِبَادَتِكَ.

رَبَّنَا آتِنَا فِي الدُّنْيَا حَسَنَةً وَفِي الأخِرَةِ حَسَنَةً وَقِنَا عَذَابَ النَّارِ.

وَالسَّلَامُ عَلَيْكُمْ وَرَحْمَةُ اللهِ وَبَرَكَاتُهُ.

Ku: DR. Yusup Tajri, M.Pd (Dewan Redaksi Bina Da’wah)

Diserat deui ku: Hanafi Anshory, kalawan sakedik perobihan.

Dicutat tina: Majalah Bina Da’wah No. 523, Syawal 1445 H / April 2024 M.